أخضر × أصفر

أعتقد أن زهور البرسيم هي إلي لونها أصفر كدة..

بس دا مش برسيم، آه دا عباد الشمس أو دوار الشمس يعني.

جميل برضوا أن يكون عندك فسحة من الزمن أنك تجيب كرسي و تقعد في الشمس قدام جنينة مزروعة كلها نجيلة و دوار شمس أخضر×أصفر.

ورد الدوار شكله جامد و هوا فاتح كل ورقة على الأخر زي العيل إلي بيفرد درعاتة عشان حد يشيلة، كل دي لحظات ممتعة في الحياة الفكرة بس أن مفيش وقت أنك تاخد بالك منها.

حتى القراءة ممكن تبقى تضيع وقت قدام منظر زي دة، هثبت لك.

هما الفلاسفة بتوع زمان أرباب العلم يعني كان عندهم كتب يفكروا فيها بعد لما يقروها..طبعاً ولا أي كلام من ده، بس كان عندهم وقت طويل يفكروا فيه إزاي وردة دوار الشمس إلي لونها أصفر في وسط الحقل إلي لونة أخضر بتلف و هي فردا أورقها زي العيال الصغيرة الرخمة مع الشمس من ساع الشروق لحد الغروب.

لحظات زي كده في حياتك ممكن تخليك تحس أنك فهمت كل حاجة في الدنيا، الحمد لله ولا لحظة من اللحظات دي عدت عليا، عشان كدة أنا لسه بتكلم معاكوا عادي.

موضوع الوقت الفاضي بالأجبار دة بيخليك تفكر بطريقة مختلفة، و تكتش حاجات في نفسك عمرك ما عرفتها، و تسترجع مهارات كانت تاهت عنك.

زي القدرة أني أكتب كلام فاضي زي إلي فوق دة، و أعمل منه موضوع.

أحمد الفاتح

۲۰۱٤/۱/۱۱