كتاكيت

يمكن مش ناس كتير تمتعت بهذه الرفاهية، تربية الكتاكيت...يمكن كنتوا بتربوا قطط، عصافير، كلاب،سمك زينه، أو حتى سلاحف..في الوقت ده أنا كنت بحترف تربية الكتاكيت..هي في الحقيقة عملية ممتعة جداً، أنك تربي كائن لسه طالع من البيضة حرفياً، و يكبر بقى يا معلم..تخيل بقى فرحتك، كمان هي شكلها جميل، لونها الذهبي ده رائع، كمان صوت الصوصوه الرفيع المزعج ده على الصبح و كل متكون بتلعب لو جعانه.

لو زي ما أنا فاكر أول مره شبطت في كتكوت كنت مع تيته في السوق، و بعدين شوفت أقصر حاجة موجوده..مكنتش متخيل أن في حاجة اقصر مني، أشبط عايز من ده عايز من ده..طبعا الرد حاضر يا حبيبي..المرحوم توفى بعدها بيوم تقريباً..من كتر الشيل و الحط و الحدف نحية الحيطة و طبعا الحموم و التزغيط..يعني كان الموت بالنسبه له رحمه.

تاني مره شوفت الراجل معدي من تحت البيت، شايل قفص، و عمال بينادي، كتاكيت، كتاكيت ملونه، أصفر و أحمر و أخضر و أزرق..و طبعا أنا مكنتش أعرف أنه بيصبغهم ف أتجننت..يا نهار أبيض هوه في كتاكيت حمرا و زرقا..أنا عايز بابا أنا عايز كتكوت أزرق..ماما أنا عايز كتكوت أحمر، و طبعا الرد المتوقع لا..مش وقتوا..أنا نقصه قرف مش كفايه أنت..و طبعاً شخص مسكين زيي و في ضألتي مش ممكن يقاوم بابا و ماما..ف لجأت لجدي و قلتلوا راح قايل ما أنت مش هتعرف تربيه و هيموت منك..طب أقلوا أنا أيه بس و أنا كنت هفهم الكلام ده أزاي وقتها..المهم جبلي 5 كتاكيت، طبعا مش أنا إلي كنت بأخد بالي منها بس كنت بلعبها كويس، و المختلف في التجربه دي أن في 3 كتاكيت كبروا و بقوا فراخ، آه ولله فراخ بس برضوا توفوا، السيد الوالد خدهم و دبحهم، يومها كانت مناحه بس إلي عرفتوا بعد كده أني أكلت منهم من غير ما أعرف.

دا حتى أنا في مره خدت الكتاكيت من الكارتونه بتعتها و طلعتها تتشمس في البلاكونه و سيبتها و دخلت اتفرج على التلفيزيون..رجعت ملقتش ولا واحد، وعرفت بعد كده أن الغربان و الحدايات خدتهم واحد ورا التاني لحد ما كلهم اختفوا.

و علشان مطولش عليكوا، لأن تربيه الكتاكيت كانت غيّة عندي..أو ممكن نقول إباده الكتاكيت، إلا أني في مره عملت معجزه بس سعتها كنت كبير شوية 5 ابتدائي كدة، جبت من مصروفي كتاكيت، قعدت أحوش و جبت بالفلوس كلها كتاكيت كانوا حوالي 14 كتكوت..رقم عملاق بالنسبه للتجارب الفاشله إلي فاتت..و لكن التجربة دي نجحت، نجى معايا 10 كتاكيت لحد ما بقوا فراخ و مبقتش عارف أوديهم فين، ف برضوا الحج تطوع و خدهم و قام معاهم بالواجب، بس دول بقى أنا كنت عارف ف مكلتش منهم، بس معملتش مناحة.

أنا دلوقتي عندي قطة، و قبلها كان عندي سمك و سلحفة و قبلها عصافير، بس لسه الكلب، عمري ما بطلت أربي حيوانات، الموضوع ممتع و جميل، ببيعلمك حاجات صعب تعرفها لو أتعاملت مع البشر و لو حتى مليون سنه، عالم نقى مفهوش وسطه و كوسه و مصالح، و حب و وفاء من طرف تالت..

و على رأي "بهيج" عمرك شوفت كلب "بلدي" اتجوز كلب "ألماني" علشان ياخد الجنسية. 

أحمد الفاتح
۲۰۱۲/۱۱/۳