خمس سنين كلية..و أولى مرتين (۳)

سنه تانية..

بدأنا بدري شوية، انزل دور على شقة كفاية قعدة في المدينة..
أنا و "حسني" و "كريم" و "بحر"..
رفقاء كفاح سنتين، رجاله من العيار الثقيل..
دور على شقة قدام الجامعأ..
الأيجار غالي و الأماكن معفنه طنش ، شوف مكان أبعد شويه..
شقه لوز في شارع قسم تالت..
و "مصطفى" جه قعد معانا..
و محل العطاره إلي تحت بيتنا..
عم "بلبل" و العطاره إلي ببلاش..
مكانش بيرضه ياخد فلوس..
جدول نضافه و طبيخ..
اتعلم تسخن طبيخ و تعمل رز..
عملنا كبسه و فراخ مشويه..
و تلاته كيلو بابا غنوج..
فول حووشي و بطاطس مخلله..
شقة الرجاله عند التعارف..
كانت عاملة زي الملجأ..
كل الكلية كانت بتروح تقعد هناك..
"علي" و "مهاب" و "عمر" و قدري" و "سمير" و "معتصم"..
"معتصم" بقى من الصحبة..
أحلى أيام الكلية..
هزار و لعب و ضرب و خناق و تنطيت..
متعلمناش حاجة..
ذاكر قبل الميدترمات..
أدخل حل أي حاجة..
الكليه كلها بتيجي لمعتصم عشان يشرح مواد الـ Math..
كان عبقري في الموضوع ده..
"أنت اصلاً بتجيب امتياز عشان الدكتور صحبك"..
الفينالات و الطحن..
لمّ نفسك خلي حد يشرح لك إلي أنت مش عارفه..
"معتصم" بيشرح، للكل عشان نعدي.. 
25 يناير 2011 كان اليوم قبل الأخير في الامتحانات..
"ركز في أمتحاناتك و متنزلش البلد عشان في ضرب و مظاهرات"..
"أسكندريه والعه ركزوا في امتحانتكم"..
رجعت السويس يوم 27 الصبح..
و اجازة طويلة عشان الثورة و الاحداث..
طلعت النتيجة و شلت مادة..
ياااااااه مادتين..
يعني عديت، عدالة أوي كدة..
رجعنا التيرم الثاني..
محدش مصدق إلي حصل..
أول محاضرة وقفنا دقيقة على أرواح الشهداء..
و تيرم جديد و روح جديدة..
و عميد الكلية خايف مننا..
و الدكاترة أحترمتنا زيادة..
أعتصمنا عشان نمشي ۲ دكاترة، و مشيناهم..
أعمل حملات توعية سياسية..
بقيت شبة مقيم في شقة التعارف..
بقعد و أكل و أشرب و أذاكر هناك..
"الدوحة" و شقة الإرسال..
الترم قرب يخلص، و المناهج بتجري..
ذاكر عشان الميدتيرمات، أول مرة مشلش ميدتيرم في الكلية..
شد حيلك عدي صافي..
"إلي مش هينجح في الامتحان ده، مش هينجح تاني إلا لو قامت ثورة"..
و نجحنا كلنا في الماده دي..
و "مهاب" جاب فيها امتياز..
اول امتياز ليه مع د.مصطفى عبد العزيز..
سلام يا رجالة اشفكوا السنة الجاية..

"أنا كتبت الخمس سنين مرة واحدة بس هحطها حبة حبة"

أحمد الفاتح

٥/٧/۲۰۱۳