ليه "تُرّهَات" لأن في العادي مفيش حد هيدي أهتمام للمكتوب أكتر مني، عشان كده أنا مش بعيط ولا بندب حظي لكن بأكتب الحاجات إلي فكرت فيها و مش عايزها تضيع مني، بأكتب الكلام إلي عاجبني و نفسي أقرأه تاني.

ليه "فِكريّة" لأنها نابعة من تفكير ممكن تناقشني في كل كلمة هكتبها هنا -لو كتبت- و هتلاقي عندي صور   واضحة عنه اكتر مما تتخيل، أفكاري يا أخي هتفهما أكتر مني.

في حاجات كتير ملهاش أسباب معينة، و حاجات اكتر بتحصل مش بنفهم حصلت ليه..منها المدونة دي  أنا مش عارف عملتها ليه ولا ناوي أكتب أيه.

   حاولت كتير أني أحط في نقط الحاجات إلي مش بحبها عشان اعرف الحاجات إلي بحبها، طبعاً معرفتش و عشان كدة هنعتبر أني بكره كل حاجة و كل تصرف عشان كدة أسهل من أني أكون بحب كل حاجه.

   الكتابة في حد ذاتها حاجة ممتعة، لكن مع متعتها فهي حاجة متعبة لأنها بتحتاج مجهود..و الصراحة أنا كسول فشخ ف متنتظروش مني معجزات أدبية يعني.

   التعميم و التسطيح من أسهل الطرق إلي ممكن تناقش بيها موضوع، ممكن تنهي المناقشة في ٥ جمل،  عشان كدة هناخدهم قاعدة في كل مواضيعنا أن شاء الله.

   طبعاً مفيش أي نوع من أنواع الإعداد المسبق لأي تدوينة، هعمل زي ما الناس بتعمل أي كلام تعبان و ملوش أدنى أهمية بالنسبة لي و بالنسبة لكم هكتبه هنا..أي كلام في أي كلام.

   عادةً هتكلم في موضيع الناس هريتها قبل كدة، عشان كدة أسهل في موضوع الأقتباس و السرقة و السخرية و خلافه..ف الموضوع مش هيكون مرهق زي ما لو هتكلم في حاجه جديدة.

   طبعاً الكلام هنا هيكون عن حاجات و مواضيع بتهم اغلب الشباب زي الإلحاد و حرية المرأة و التحرش و أزاي تصاحب و خلافة من الموضوعات المؤثرة في حياتنا اليومية.عادةً الكلام إلي موجود هنا هيكون قديم و هكون كاتبه قبل كده، فمش ديماً هتلاقي مواضيع تمس الأحداث الساعة و الكلام ده..بس ديماً هتلاقي التاريخ إلي أتكتب فيه الكلام ده.

   طبعاً محدش ينتظر أننا نقدم حلول، لأن مش دي شغلتنا احنا شغلتنا نسلط الضوء و نضخم المشكلة على قد ما نقدر و نتريق على كلام الناس التانية و حلولهم و خلاص.

   بعكس ناس كتير -دي حاجة أنا بعتبرها ميزة فيا- اني بأتقبل النقد أو بعمل نفسي بأتقبل النقد، ف ممكن و بكل راحة تقول رأيك في الكلام يمكن استفاد من نباهتك. 
طبعاً بعد كل الكلام إلي فوق ده أنت بتسأل نفسك -لو كنت قريت أصلاً-: "أيه يخليني أقرأ أو اتابع المدونة دي؟"، أنا أقولك تابع يمكن تلاقي حد يحسسك أنه أغبى أو أتفه منك فيفضل عندك أمل أنك تكون أحسن..بدل ما كل خلق الله بيدوك على قفاك.
نصيحة: لو كل الكلام إلي في المدونة معجبكش ممكن تبص على "قراءات و كتب" أكيد هتلاقي حاجة مفيدة.

   للشخص إلي هيوصل لأخر التدوينة التعبانة دي..بقالي فترة نفسي أكتب مع حد، أو أعمل برودكاست مع حد ف لو شايف أن في فرصة أننا نتشارك في أي حاجة من النوع دة، أتفضل نورني.

"بقالي أسبوعين بحاول اكتب الأفتتاحية دي، و مش عارف..بس من الملل في قطار إسكندرية خلصتها في ربع ساعة"

أحمد الفاتح

٧/۲۰۱۳/۱۱